វិធីគ្រប់គ្រងស្ត្រេសនៅកន្លែងការងារ

Search for Job Here

Go Back

ស្ត្រេសជារឿងដែលជៀសមិនផុតនៅកន្លែងការងារពិសេស សម្រាប់អ្នកធ្វើការចាប់ពីកម្រិតថ្នាក់ដឹកនាំឡើងទៅ។ ស្ត្រេសពេលខ្លះមកពីការមិនចេះបែងចែករវាងការធ្វើការខ្លាំង និងប្រឹងធ្វើការជ្រុល។

ស្ត្រេសអាចបណ្ដាលមកពីកត្តាជាច្រើនរាប់តាំងពីការងារ កត្តាគ្រួសារ កត្តាខ្លួនឯង និងសុខភាពជាដើម។ ត្រូវដឹងថា មូលហេតុដែលនាំឲ្យស្ត្រេសនោះមកពីណា។ ទាំងនេះជាមូលហេតុដ៏ពេញនិយមដែលបណ្ដាលឲ្យអ្នកស្ត្រេស៖

• ប្រាក់ខែតិចពេក

• ការងារច្រើនពេក

• អត់មានឱកាសអភិវឌ្ឍ ឬឡើងតំណែង

• ការងារមិនមានចំណុចទាក់ទាញ ឬស្រួលពេក

• គ្មានការគាំទ្រពីមនុស្សជុំវិញ

• គ្មានការសម្រេចចិត្តលើការងារដែលកំពុងធ្វើ

• តម្រូវការមិនច្បាស់ ឬការរំពឹងទុកមិនត្រឹមត្រូវជាដើម ។ល។

ដូច្នេះ ដើម្បីដោះស្រាយបញ្ហានេះបានត្រូវរកឫសគល់ដែលនាំឲ្យអ្នកមានបញ្ហាជាមុន។

ទី ១ ត្រូវរៀនតាមដាន

កត់ត្រាពីអារម្មណ៍របស់អ្នកថា នៅពេលដែលស្ត្រេសកើតឡើងគឺនៅពេលណា ស្ថានភាពណា? ហើយរកលំនាំដែលនាំទៅរកស្ត្រេសនោះ។

ទី ២ រកវិធីទប់ទល់ដែលល្អសម្រាប់សុខភាព

អ្នកខ្លះគឺ នៅពេលស្ត្រេសគឺ ចូលចិត្តញ៉ាំអាហារ Fast Food សេពគ្រឿងស្រវឹងអីជាដើមដែលនាំឲ្យមានបញ្ហាសុខភាព។ សាកល្បងហាត់ប្រាណ ហាត់យូហ្គា ឬសកម្មភាពណាដែលល្អចំពោះអ្នកពេលមានអារម្មណ៍ថា ស្ត្រេសម្ដងៗ។

ទី ៣ ចេះកំណត់ព្រំប្រទល់សម្រាប់ខ្លួនឯង

ក្នុងសម័យឌីជីថលនេះ ការឆ្លើយឆ្លងគ្រប់ពេលបង្កផលវិបាកមួយចំនួនចំពោះតុល្យភាពជីវិត។ ត្រូវរៀនបង្កើតតុល្យភាពការងារ និងជីវិតសម្រាប់ខ្លួនឯង។ តុល្យភាពត្រង់នេះ មិនសំដៅថា ត្រូវធ្វើការ និងសម្រាកស្មើគ្នាម៉ោងគ្នាទេ។ តែត្រូវចេះបែងចែកពេលណាគួរផ្ដោតលើការងារ ពេលណាគួរផ្តោតលើសុខភាព និងគ្រួសារជាដើមនោះ។ ដូចនេះ អ្នកមិនលូកលាំគ្នារហូតគ្មានច្បាស់លាស់លាស់សម្រាប់មួយៗនោះទេ។

ទី៤ ឲ្យពេលខ្លួនឯងសាកថ្មខ្លះ

កុំធ្វើការហួសហេតុរហូតដល់មានបញ្ហា។ បើក្រឡេកមើល នៅប៉ែកអឺរ៉ុបគេធ្វើការខ្លាំង តែពេលសម្រាកគឺ គេបិទអស់រាល់ឧបករណ៍អេឡិចត្រូនិក ចំណាយពេលជាមួយធម្មជាតិ ឬភាពស្ងប់ស្ងាត់ដើម្បីឲ្យរាងកាយរបស់គេមានថាមពលជាថ្មី។

ទី ៥ ចេះសម្រាក

សម័យបច្ចេកវិទ្យាការរំខានគឺ ខ្លាំងមែនទែន។ អ្នកកាន់ទូរស័ព្ទសឹងថា ២៤ លើ ២៤ ម៉ោង។ នៅពេលធ្វើការក៏ចុច សម្រាកញ៉ាំបាយក៏ចុច ចូលបន្ទប់ទឹកក៏ចុច។ សរុបមកជីវិតរបស់យើងគឺ មិនមានពេលសម្រាកឲ្យបានសមស្របឡើយ។ តិចនិកសាមញ្ញដែលអាចឲ្យរាងកាយសម្រាកបានមានដូចជា ការរៀនគ្រប់គ្រងការដកដង្ហើម ការធ្វើសមាធិ និងការស្វែងរកភាពរីករាយសម្រាប់ជីវិតជាដើម។

ចុងក្រោយគេ គឺហ៊ានស្វែងរកជំនួយ

បើអ្នកគិតថា ស្ថានភាពរបស់អ្នកគឺ ធ្ងន់ធ្ងន់ធ្ងរ គួររកជំនួយពីមិត្ត ភក្តិដែលអ្នកទុកចិត្ត គ្រួសារ ឬមេកើយដែលអ្នកជឿជាក់។ ពួកគេអាចជួយបានតាមរយៈការស្ដាប់ ប្រឹក្សា ឬក្នុងករណីធ្ងន់ធ្ងរអាចនាំអ្នកទៅរកអ្នកជំនាញផ្នែកសុខភាពផ្លូវចិត្តជួយអ្នកបានទាន់ពេលវេលា។

ត្រូវចាំថា សុខភាពផ្លូវកាយសំខាន់ តែបើសុខភាពផ្លូវចិត្តដុនដាប ស្ត្រេសគ្រប់ពេល វាអាចនឹងជះផលប៉ះពាល់ដល់លទ្ធផលការងារ និងជីវិតរស់នៅក្នុងគ្រួសារបាន៕