កំហុស១០ យ៉ាងគួរចៀសវាងពេលទៅសម្ភាស
ការមិនបានត្រៀមខ្លួនឲ្យល្អសម្រាប់ការសម្ភាសជារឿយៗបង្កជាផលវិបាក
ឬអាចឲ្យការសម្ភាសអ្នកបរាជ័យ។ ទាំងនេះជាកំហុស ១០ យ៉ាងដែលឧស្សាហ៍កើតមានបើគ្មានការត្រៀមខ្លួនឲ្យបានល្អជាមុន។
១. ស្លៀកពាក់មិនសមរម្យ
ការរៀបចំខ្លួនជាចំណុចដំបូងគេ
ដែលទាក់ទាញដល់អ្នកសម្ភាស ដូច្នេះ បើអ្នករៀបចំខ្លួនមិនបានល្អទេ
ទំនុកចិត្តរបស់អ្នកក៏ខើចទៅតាមនោះដែរ។
២. ទៅសម្ភាសយឺត
ការចូលសម្ភាសយឺតបង្ហាញពីការមិនយកចិត្តទុកដាក់
និងគោរពម៉ោងពេលរបស់អ្នករួចទៅហើយ។
ដូច្នេះគួរសួរនាំឲ្យស្គាល់ក្រុមហ៊ុនដែលត្រូវទៅសម្ភាសជាមុន
និងរយៈពេលធ្វើដំណើរដើម្បីចៀសវាងការខកខានដោយប្រការណាមួយ។
៣.
កាន់ភេសជ្ជៈចូលសម្ភាស
ការកាន់ភេសជ្ជៈចូលសម្ភាសបង្ហាញឲ្យឃើញភាពមិនសមរម្យ
មិនយកចិត្តទុកដាក់របស់អ្នក។ បើស្រេកទឹក ឬឃ្លានកាហ្វេខ្លាំង
គួរញ៉ាំឲ្យអស់មុនចូលសម្ភាសជាជាងការកាន់រយីងរយោង។
៤.
បើកសម្លេងទូរស័ព្ទ ឬប្រើទូរស័ព្ទពេលសម្ភាស
អ្នកគួរបិទសម្លេងរោទ៍
ឬបើអាចបិទទូរស័ព្ទតែម្ដងពេលចូលសម្ភាស
ព្រោះវាជាអាកប្បកិរិយាមិនសមគួរដែលអាចឲ្យអ្នកធ្លាក់សម្ភាសបានដោយងាយ។
៥.
មិនស្គាល់អីបន្តិចពីក្រុមហ៊ុន
ត្រូវសិក្សាឲ្យដឹងខ្លះៗពីក្រុមហ៊ុនជាមុន
កុំឲ្យពេលអ្នកសម្ភាសសួរ អ្នកឆ្លើយថា អត់ដឹងផង
ដែលនេះក៏អាចឲ្យអ្នកធ្លាក់បានដូចគ្នា។
៦.
និយាយផ្ទុយពីប្រវត្តិរូប
ត្រូវរៀបចំប្រវត្តិរូប
(CV) ឲ្យបានល្អ
ខែឆ្នាំធ្វើការ ខែឆ្នាំសិក្សា ត្រូវប្រាកដអ្នកចាំច្បាស់
និងអាចនិយាយបានដោយរលូន កុំឲ្យពេលបរិយាយគឺ
ផ្ទុយពីអ្វីដែលអ្នកសរសេរ
ដែលនេះក៏បង្ហាញពីការបាត់បង់ទំនុកចិត្តដែរ។
៧.
មិនយកចិត្តទុកដាក់
បង្ហាញការស្ដាប់
និងក្រសែភ្នែកទំនាក់ទំនងដោយយកចិត្តទុកដាក់ជាមួយអ្នកសម្ភាស។
ការបង្ហាញពីការមិនយកចិត្តទុកដាក់ក៏អាចឲ្យអ្នកសម្ភាសមានអារម្មណ៍មិនល្អ
និងចាត់ពិន្ទុមិនល្អដល់អ្នកដូចគ្នា។
៨.
និយាយបែកអូរហូរស្ទឹង
មិននិយាយសោះក៏មិនល្អ
តែបើនិយាយបែកអូរហូរស្ទឹងពេកក៏គួរឲ្យធុញដូចគ្នា។
ឆ្លើយសំណួរឲ្យបានចំៗ ច្បាស់ៗ មិនចាំបាច់ប៉ប៉ាច់ប៉ប៉ោចពេកក៏បាន។
៩
មិនត្រៀមឆ្លើយសំណួរលំបាកៗ
ក្រៅតែពីសំណួរទូទៅពីអ្នក
និងបទពិសោធន៍ចាស់ៗ អ្នកក៏គួរត្រៀមឆ្លើយសំណួរលំបាកៗជាមុនដូចគ្នា។
ឧទាហរណ៍អ្នកសម្ភាសឲ្យស្ថានភាពមួយឲ្យអ្នកដោះស្រាយបញ្ហា
តើអ្នកនឹងដោះស្រាយដោយរបៀបណា?
១០.
និយាយមិនល្អពីក្រុមហ៊ុនចាស់
មូលហេតុចម្បងមួយអាចឲ្យអ្នកអត់បានការងារគឺ
ការនិយាយដើមក្រុមហ៊ុនចាស់។ ជាធម្មតា បើអ្នកនិយាយមិនល្អពីក្រុមហ៊ុនចាស់
អនាគតក្រុមហ៊ុនដែលចង់បានអ្នកក៏នឹងគិតថា
ថ្ងៃមុខអ្នកក៏និយាយអាក្រក់ពីក្រុមហ៊ុនគេបានដូចគ្នា។
អញ្ចឹងគួរចៀសវាងចំណុចនេះ មិនថា
អ្នកអាក់អន់ស្រពន់ចិត្តយ៉ាងម៉េចក៏ដោយ។
កុំឲ្យកំហុសសាមញ្ញៗទាំងនេះ
ទាញទម្លាក់សក្ដានុពលរបស់អ្នកពេលសម្ភាសណា៎!
